再見，事頭婆 Queen Elizabeth II。

英女王伊利沙伯二世喺多名王室成員陪同下，今日喺蘇格蘭巴爾莫勒爾堡離世，享耆壽96歲。

前後歷經15任英國首相、在位超過70年，作為英國皇室史上在位最長嘅君主，事頭婆一直都係英國皇室以至英國嘅象徵。上年送別相伴74年嘅菲臘親王之後，外界一直都對英女王身心健康相當關注，尤其係今年2月英女王曾經確診Covid-19，即使痊癒後佢都表示疾病令佢感覺嚴重疲勞。

英女王最後一次露面，係兩日前任命Liz Truss接替Boris Johnson成為新一任英國首相，原定噚日佢會以視像形式出席樞密院會議，但喺醫生勸喻下英女王選擇休息。到今日就傳出醫生建議英女王接受醫學監察，而一眾皇室成員包括王儲查理斯夫婦、威廉王子，以至已經脫離皇室嘅哈利王子都趕赴蘇格蘭，陪伴英女王。

再見，事頭婆。